Satua Bali

PAN BALANG TAMAK

Ada reko anak madan Pan Balang Tamak. Kacerita ia sugih pesan tur ririh makruna, muah tuara nyak kalah teken pada timpalne. Yen upamayang dayan Pan Balang Tamake patuh buka bun singkad lutunge, baan saking beneh. Ento kranane pan balang tamak sengitanga ban desane.
Di sedek dina anu paum desane bakal nayanang pan balang tamak, mangdane ia kena denda. Lantas panyarikan desane nunden ngarahin pan balang tamak, kene arah-arahe, “ih pan balang tamak, mani semengan mara tuun siap, desane luas ka gunung ngalih kayu, bakal anggon menahin bale agung. Nyen ja kasepanan, bakal denda.” Keto arah-arahe teken pan balang tamak. Kacacita mani semengan mara tuun siap, lis desane makejang, nanging pan balang tamak masih enu jumah padidian, krana ia ngantiang siapne tuun uli bengbengane. Ada jenengne makakali tepet, mara siapne tuun uli di bengbengan, ditu mara ia majalan, nututin desane luas ngalih kayu ka gunung. Kacrita suba neked jumah, lantas desane paum, maumang pan balang tamak lakar kena denda, krana ia tuara nuutang arah-arahe.
Kacrita buin manine pan balang tamak kaarahin ngaba sangauk, bekel menahang bale agung. Pan balang tamak ngaba sanggah uug ka pura desa sambilanga makruna kene, “ene sanggah uug, apanga benahanga baan desane.” Dadi engon desane ngenot abet pan balang tamake keto. Manine pan balang tamak kaarahin maboros kagunung. Kene arah-arahe, “mani desane maboros, apanga ngaba cicing galak. Nyen tuara ngelah cicing galak, lakar kena denda.” Kocap buin manine las desane maboros, tur pada ngaba cicing galak-galak, ngliwat pangkung ngrembengan dalem-dalem. Yen pan balang tamak paling durina pesan sambilanganyangkol cicingne. Mara ia neked sig ngrembenge, sing dadi baan liwat, lantas ia ngae daya apang mangden desane teka nyagjagin ibane, laut ia jerit-jerit. “bangkung tra gigina, bangkung tra gigina.” Mara dingeha baan desane, kadena timpalne nepikin bangkung, lantas pada nyagjagin. Mara neked idtu enota pang balang tamak jerit-jerit, lantas takonina, “ apa kendehang pan balang tamak?” masaut pan balang tamak, kene pasautne, “ pangkung tra ada titian.” Beh, sengap desane, belog-belog baan pang balang tamak.
Manine buin pan balang tamak kaarahin, yen sing eda dadi ngenjek karang anak muah malih-alihan ka abian anake, yen lejeh bani, bakal kena denda gede. Keto uar-uare. Jet keto baan pan balang tamake tuara keweh, krana ia saking patut. Ditu ia ngae daya, gerete pulete ane di sisin pekene anggona abian pagehina lidi, apesina baan benang. Kacrita mara tebeng pekene, ada anak makita masakit basang, endahanga baan pan balang tamak. lantas nylisib ka pulete, laut masuak pan balang tamak,”ih jero desa, tiang nandanin anak ngamaling ka abian tiange.” Dadi cengang anake ne masakit basang endahanga baan pan balang tamak. Masaut anake masakit basang, “apa salah tiange, muah dadi nagih nandain jero?” masaut pan balang tamak, “ jerone macelep ka abian tiange muah mamaling pamula-mulaan tiange. Ento apa bongkos jerone?” mara ungkabanga, saja mrereket pulete sig kambenne. Puputne payu ia dendaina baan pan balang tamak.
Gelisang crita, suba kone kicen cetik ane paling mandina, apanga pan balang tamak mati sapisanan. Kocap pan balang tamak suba ningeh bakal kagae-gaenang patine, lantas ia makruna teken kurenanne, “ yen awake suba mati, gantungin bok awake temblilingan. Suba keto sededengang sig piasane. Buina pagelah-gelahane pesuang, pejang sig bale sekenem, rurubin baan kamben putih sambilang pangelingin. Nah, bangken awake wadahin peti, pejang jumah meten.” Gelisang cerita, suba pan balang tamak mati ngamah cetik paican anake agung. Kacrita suba sanja, ada dusta ajaka patpat mapaiguman, bakal mamaling ka umah pan balang tamake. Mara enota kurenan pam balang tamake mangelingin kurenane sig bale sekeneme, lantas ia macelep ka umah meten, tepukina peti gede buin baat pesan, laut sanglonga, senamina, tegena ajaka patpat. Suba kone neked di tengah bête, makruna timpalne, “dini suba gagah!” masaut timpalne,” maebo bangke dini, jalan indayang dituan.” Lantas kisidang masih maebo bangke. Buin makruna timpalne, “jalan suba aba ka pura desa, ditu nyen bani ngutang bangkan.” Masaut timpalne, “jalan!” lantas tegena petine, abana ka pura. Mara neked ditu, lantas ungkabanga. Mara enota banagken pan balang tamake nyengkang, lantas plaibina, kutanga petine ditu.
Kacrita manine mara galang kangin, nuju jero mangku ngaturang canang ka pura, mara nengok sig kori agunge, tingalina ada peti gede di natah piase, lantas jero mangku masila tiding sambilanga nyumbah. Baan sing bani mungkah, ngantiang apanga pepek desane teka. Suba kone pepek nyumbah, lantas lantaas petine bungkaha, nget bangken pan balang tamake nyengku, dadi tangkejut desane, buin pada musuhin bangken pan balang tamake. Ento japin anake pisuhin, mlutang ye, kadung suba bakat sumbah. Puputne desane tuyuh meanin muah nanemang bangken pan balang tamake.

About these ads

Berikan Balasan

Isikan data di bawah atau klik salah satu ikon untuk log in:

WordPress.com Logo

You are commenting using your WordPress.com account. Logout / Ubah )

Twitter picture

You are commenting using your Twitter account. Logout / Ubah )

Facebook photo

You are commenting using your Facebook account. Logout / Ubah )

Google+ photo

You are commenting using your Google+ account. Logout / Ubah )

Connecting to %s